Regionların sosial-iqtisadi inkişafının aktual problemləri sahibkarların iştirakı ilə müzakirə olunub

Yanvarın 26-da Bakıda Prezident İlham Əliyevin iştirakı ilə “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunmuş konfrans keçirilib. Rəsmi hissədən sonra konfrans işini bölmə iclasları ilə davam etdirib.

Regionlarda istehsal sahələrinin, emal müəssisələrinin yaradılması prioritet istiqamətlərdir.

İqtisadiyyat sahəsi üzrə təşkil olunan bölmə iclasında sahibkarlar və icra hakimiyyətlərinin başçıları iştirak ediblər. İqtisadiyyat naziri Şahin Mustafayevin moderatorluğu ilə keçən bölmə iclasında regionlarda sahibkarlığın inkişaf etdirilməsi, bu sahədə qarşıya çıxan problemlər və onların həlli yolları müzakirə olunub.

“Əgər 10-12 il bundan əvvəlki vəziyyətlə regionlarımızda olan indiki vəziyyəti müqayisə etsək, böyük inkişaf görərik. Bu gün regionların siması büsbütün dəyişib. Hazırda regionlarda istehsal sahələrinin, emal müəssisələrinin yaradılması bizim üçün prioritet istiqamətlərdəndir”, – deyən iqtisadiyyat naziri dünya bazarında neftin qiymətinin 4 dəfə aşağı düşməsinin ölkə iqtisadiyyatına təsirindən danışıb. Qeyd edib ki, bu mənfi təsirlərin aradan qaldırılması üçün Prezident İlham Əliyev tərəfindən lazımi tapşırıqlar verilib. Son illər regionlarda sosial-iqtisadi sahədə görülən işlərdən də bəhs edən Ş.Mustafayev deyib ki, ölkəmizdə sahibkarlığın inkişafına göstərilən diqqət və qayğı Prezident İlham Əliyevin bu sahəyə nə qədər böyük önəm verdiyini göstərir. Hazırda qarşımızda duran əsas məqsəd idxaldan asılılığın azaldılmasından ibarətdir. Bunun üçün isə ölkədə sahibkarlıq inkişaf etdirilməlidir. Bu istiqamətdə bir çox tədbirlər görülüb. Güzəştlərin tətbiq olunması, yoxlamaların dayandırılması, lisenziya verilməsi prosedurlarının sadələşdirilməsi, investisiyaların təşviqi və digər tədbirlər, ümumilikdə, bu sahənin inkişafına təkan verəcək.

Nazir vurğulayıb ki, ixracın stimullaşdırılması da bu gün əsas müzakirə mövzularından biridir. Hazırda kənd təsərrüfatı məhsulları istehsalçılarına maliyyə dəstəyi mexanizmi üzərində iş aparılır. Eyni zamanda, dövlət yerli məhsulların təşviqində yaxından iştirak edəcək, Azərbaycan brendləri yaradılacaq. Hesab edirik ki, bir sıra Azərbaycan məhsullarının rəqabət qabiliyyəti yüksəkdir. Bu sahədə əlavə təşviqi mexanizmlər tətbiq olunmaqla, işləri daha da yüksək səviyyəyə qaldıra, həm yerli istehsalı artıra, həm də ixrac potensialımızı gücləndirə bilərik.

Diqqətə çatdırılıb ki, yerli icra hakimiyyətlərinin rəhbərləri və bələdiyyələr həm dövlət fonduna daxil olan, həm də özəl torpaqlardan istifadə ilə bağlı təhlil aparmalı və sahibkarlara, investorlara boş ərazilər barədə məlumat verməlidirlər. İş adamları da həmin ərazilərdən səmərəli istifadə etməlidirlər. Şahin Mustafayev deyib ki, Prezident İlham Əliyev rayonlarda sənaye məhəllələrinin yaradılması ilə bağlı qarşıya çox ciddi vəzifə qoyub. Pilot layihə olaraq Neftçalada sənaye məhəlləsinin yaradılmasına başlanılıb və xeyli iş görülüb. Artıq orada sahibkarların kreditləşdirilməsi məsələlərini həll edirik, ümumi dəyəri

20 milyon manat olan 7 layihə reallaşdırılacaq. Zənnimcə, bu, Neftçala rayonu üçün az məbləğ deyil. Artıq Ağdamda, Mingəçevirdə, Şəmkirdə də bu istiqamətdə iş aparılır. Hər bir icra strukturu, sahibkar bu məsələyə daha çox önəm verməlidir. Yaxşı olar ki, rayonlarda infrastrukturlara yaxın müvafiq yerlər seçilsin və orada sənaye məhəllələri yaradılsın. İşığı, qazı, suyu və digər kommunal infrastrukturu olan yerin seçilməsi sahibkarın xərcini, həmçinin oraya yatırılacaq investisiyanın miqdarını 30-40 faiz azalda bilər. Sahibkarlar bu xərcdən azad olunsa, onlar həmin vəsaitləri avadanlıqların alınmasına və digər işlərə yönəldə bilərlər. Sənaye məhəlləsinə ümumi yol çəkilə bilər ki, həmin yoldan da hər bir sahibkar istifadə edər. İş adamları bir yerdə cəmləşərsə, orada bank, vergi, notarial və digər xidmətləri də təşkil etmək olar ki, iş daha da asanlaşsın. Sonra isə biznes inkubatorların yaradılması məsələsinə baxıla bilər.

Bildirilib ki, ərzaq təhlükəsizliyinin təmin olunmasında əsas istiqamətlərdən biri də taxılçılığın inkişaf etdirilməsidir. İri taxılçılıq təsərrüfatlarının ərazisinin, ümumilikdə, 150 min hektara çatdırılması nəzərdə tutulur. Hazırda bu, 29 təsərrüfat üzrə 40 min hektar sahəni əhatə edir. “Kənddə yaşayan insan öz torpaq sahəsində ötənilki məhsuldan götürdüyü taxıldan toxum kimi istifadə edir. Yüksək reproduksiyalı toxum almaqda maraqlı deyil. Ona görə də iri təsərrüfatların yaradılması, onların yüksək reproduksiyalı toxumlarla təmin edilməsi daha sərfəlidir. Belə təsərrüfatlarda sahələrə ciddi nəzarət edilir və yüksək məhsuldarlıq əldə olunur”, - deyə iqtisadiyyat naziri vurğulayıb.

Sonra sahibkarlar və icra hakimiyyətlərinin başçıları çıxış edərək, iş adamlarına yaradılan şəraitdən danışdılar, bu istiqamətdə atılan addımları təqdir etdilər. Bölmə iclasında kiçik və orta sahibkarlığın inkişafına əlavə dəstək göstərilməsi, yerli istehsalın dəstəklənməsi, ixracın stimullaşdırılması, regionlarda emal müəssisələrinin yaradılması, əkinlərə subsidiyanın yekun məhsula görə verilməsi və digər təkliflər səsləndirildi.

Şahin Mustafayev qaldırılan məsələlərin nəzərdən keçiriləcəyini və müvafiq qərarların veriləcəyini bildirdi.

AZƏRTAC


© İstifadə edilərkən "Xalq qəzeti"nə istinad olunmalıdır.



  • I Avropa Oyunlarının təəssüratları uzun müddət xatirələrdə yaşayacaq

    I Avropa Oyunlarının təəssüratları uzun müddət xatirələrdə yaşayacaq

  • Hər gün bir tarix, hər gün bir zəfər

    Hər gün bir tarix, hər gün bir zəfər

  • Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

    Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

  • “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

    “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

  • Siyəzən birinci Avropa Oyunlarının məşəl estafetini qəbul etdi

    Siyəzən birinci Avropa Oyunlarının məşəl estafetini qəbul etdi

Çox oxunanlar



Təqvim

Hava haqqında