Britaniyalı fizik Stiven Hokinq Yer kürəsində qlobal istiləşmələrlə bağlı  həyəcan təbili çalmağa başlayıb. Hokinqin proqnozlarına görə, Yerkürəsində istixana effekti və ya parnik effekti adlandırılan problem həll edilməzsə,  planetimiz Veneranın taleyini yaşaya bilər. Bu barədə “Planet today” məlumat yayıb.

Alimin tədqiqatlarına görə 4 milyard il bundan öncə Venera Yer kürəsinə çox bənzəyib. Orada flora və fauna mövcud olub. Planetin temperaturu isə Yerin hazırdakı iqliminə uyğun olub. Lakin atmosferdə parnik qazlarının həddən artıq  toplanması Veneranın səthində 460 dərəcəyə qədər  temperaturun isinməsinə gətirib çıxarıb.

NASA mütəxəssislərinin  tədqiqatlarına əsasən, Yer kürəsinin yaşının 4,5 milyard il olduğu nəzərə alınsa, artıq 500 ildən sonra insanlar  özü üçün yeni “ev” axtarmalı olacaq.

Xatırladaq ki, bir müddət əvvəl də professor Stiven Hokinq 2060-cı ilə kimi Yer planetinin yox olacağını proqnozlaşdırmışdı.

Elçin ABBASOV,
“Xalq qəzeti”